Фақат Ўзидан сўрайлик!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳ таоло Қуръони Каримда шундай деб марҳамат қилган:
«Қачон бандаларим сендан Мен ҳақимда сўрасалар, бас, албатта, Мен яқиндирман. Дуо қилувчи Менга дуо қилганда, дуосини ижобат қилурман. Бас, Менга ижобат қилсинлар ва Менга иймон келтирсинлар. Шоядки, тўғри йўлни топсалар» (Бақара сураси, 186-оят).
Бирлашган Араб Амирликларининг таниқли тадбиркорларидан бири билан матбуот анжумани бўлаётган эди. Журналистлар тадбиркордан бошидан кечирган энг ажойиб воқеа ҳақида сўрашди. Тадбиркор гап бошлади:
«Кечаларнинг бирида бироз безовталикни ҳис этдим ва тоза ҳавода сайр қилишга қарор қилдим. Бир маҳалладан ўтиб кетаётганимда, очиқ турган масжид ёнидан ўтдим. Ўзимга ўзим: «Нега бу ерга кириб, икки ракат намоз ўқимаслигим керак экан?!» дедим-да, шартта масжидга кирдим. Қарасам, масжид ичида бир киши қиблага юзланган ҳолда қўлларини кўтариб, Аллоҳ таолога шунақа дуо қиляптики, берилиб, зорланиб дуо қилаётган эди. Унинг ҳолатини кўриб, қийин аҳволда қолганини англадим.
У дуо қилиб бўлгач, ундан сўрадим: «Қарасам, дуо қилаётган экансиз. Бошига ташвиш тушган одам каби берилиб, зорланиб дуо қилаётганингизни кўрдим, сизга нима бўлди?»
«Зиммамда мени чарчатиб, безовта қилиб турган қарзим бор» деди у.
«Қанча қарзингиз бор?» деб сўрагандим, «Тўрт минг» деди.
Ҳамёнимдан тўрт минг чиқариб, унга узатдим. Хурсанд бўлиб, ташаккур айтди ва ҳаққимга дуо қилди. Сўнг ёнимдан телефон рақамим ва манзилим ёзилган ташриф қоғозимни олдим ва унга «Бу ташриф қоғозини олинг. Агар бирор ҳожатингиз бўлиб қолса, олдимга келишга ёки менга қўнғироқ қилишга иккиланманг» дедим.
Ўзимча у бу таклифдан хурсанд бўлади деб ўйладим.
Лекин унинг айтган гапи мени лол қолдирди. У нима деганини биласизми?
«Йўқ, биродарим, Аллоҳ сизни яхшилик ила мукофотласин! Бу ташриф қоғозига эҳтиёжим йўқ. Ҳар гал бирор ҳожатим чиқиб қолса, Аллоҳга ибодат қилиб, қўлларимни кўтариб, ҳожатимни Ўзидан сўрайман. У Зот худди ҳозир ҳам ҳожатимнинг раво бўлишини осон қилгани каби доим осон қилмоқда» деди.
Ушбу қисса мана бу саҳиҳ ҳадисни ёдимга солди.
عن عبد الله بن عمر رضي الله عنهما عن النبي صلى الله عليه وآله وسلم:
” لو توَكّلتُم على الله حَقّ توَكُّلِهِ لَرَزَقَكُم كما يَرزُقُ الطيرَ تَغدو خِماصا وتَروحُ بِطانا ”
(الترمذي وقال حديث حسن وصححه الحاكم)
Абдуллоҳ ибн Умар розияллоҳу анҳумо Расулуллоҳ соллаллоҳу алайҳи васалламдан ривоят қиладилар:
«Агар сизлар Аллоҳга ҳақиқий таваккул ила боғланганингизда эди, оч кетиб тўқ қайтган қуш каби ризқланган бўлар эдингиз».
Термизий ривоят қилган ва ҳасан-саҳиҳ деган, Ҳоким саҳиҳ, деган.
Аллоҳ таоло бизни Ўзига ҳақиқий маънода таваккул қилувчи ва ҳожатини фақат Ўзидан сўровчи бандаларидан айласин!
У Зот барчамизни Ўзининг ҳидоятидан айирмасин ва хотимамизни чиройли қилсин!
Интернет маълумотлари асосида
Нозимжон Ҳошимжон тайёрлади
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
