Рўзадор киши атир, мисвок ишлатиши мумкинми?
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳазрат, рўзага доир қуйидаги саволларим бор эди:
1. Ҳазрат, рўзадор инсон атир ишлатса, бўладими? Масалан, сепиладиган ёки суриладиган. Суриладиган атир ишлатса, рўза бузилмайдими?
2. Рўзада мисвок ишлатса бўладими?
3. Рўзадор одамнинг бирор жойи тирналса ёки кесиб олса, қон чиққанда рўза бузилмайдими?
ЖАВОБ: Бисмиллаҳир Роҳманир Роҳийм
1. Рўзадорнинг ичига унинг ихтиёрисиз тутун, чангу ғубор ёки пашша кирса ҳам рўзаси очилмайди. Аммо рўзадорлигини эслаб туриб хушбўй нарсани тутатиб ҳидласа, рўзаси очилади.
Атир ишлатиш рўзани очмаса-да, ундан сақланган яхши.
2. Рўзадор мисвок ишлатса, бўлади. Аммо Пешиндан кейин ишлатмагани яхши.
Мисвок қилиш ва сурма қўйиш макруҳ эмас.
Омир ибн Рабийъа розияллоҳу анҳудан ривоят қилинади:
«Мен Набий соллаллоҳу алайҳи васалламнинг рўзадор ҳолларида мисвок қилаётганларини санаб саноғига, ҳисоблаб ҳисобига ета олмайдиган даражада кўп кўрганман».
Абу Довуд, Бухорий ва Термизий ривоят қилишган.
Рўза тутган одам мисвок қилиши яхши эканини уламолар жумҳури таъкидлаган. Шу билан бирга, баъзи уламолар рўзадорнинг оғзидан чиқадиган ҳид Аллоҳнинг ҳузурида мушки анбарнинг ҳидидан афзаллиги ҳақидаги ҳадиси шарифнинг эътиборидан, завол вақтидан кейин мисвок қилмаган яхши, дейишади. Чунки, рўзадорнинг оғзидан ўша ҳид завол вақтидан кейин чиқа бошлайди.
Анас розияллоҳу анҳудан ривоят қилинади:
«Бир киши Набий соллаллоҳу алайҳи васалламга:
«Кўзим оғриб қолди, рўзадор ҳолимда сурма қўяверайми?» – деди. У зот соллаллоҳу алайҳи васаллам:
«Ҳа», – дедилар».
Термизий ривоят қилган.
Оиша розияллоҳу анҳодан ривоят қилинади:
«Набий соллаллоҳу алайҳи васаллам Рамазонда рўзадор ҳолларида сурма қўйганлар».
Ибн Можа ривоят қилган.
Анас розияллоҳу анҳу ҳам рўзадор ҳолларида сурма қўяр эдилар.
3. Қон чиқиши рўзани бузмайди. Валлоҳу аълам.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
