Илм талабида кўп сафарда бўлган олим
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Имом, ҳофиз, фақиҳ, Насаф қозиси, улуғ олим Абу Исҳоқ Иброҳим ибн Маъқил ибн Ҳажжож Насафий. Насаф «Нахшаб» ҳам дейилган.
Қутайба ибн Саъид, Жуббора ибн Муғаллис, Ҳишом ибн Аммор, Абу Курайб, Аҳмад ибн Манеъ ва уларнинг табақасидагилардан ҳадис эшитганлар.
Илм талабида кўп сафарда бўлганлар.
Бу кишидан Али ибн Иброҳим Тағомий (Тағом – Бухоро атрофидаги бир жой), Халаф ибн Муҳаммад Хайём, Абдулмўмин ибн Халаф, Муҳаммад ибн Закариё ва у кишининг ўғиллари Саъид ибн Иброҳим ҳадис ривоят қилганлар.
Абу Яъло Халилий: «У киши сиқа, ҳофиз. 295 йил зулҳижжа ойида оламдан ўтганлар», – деганлар.
«Муснад ал-кабир», «Тафсир» ва бошқа китоблари бор.
Имом Бухорийнинг «Саҳиҳ»ларини ривоят қилганлар. Мужтаҳид ва фақиҳ бўлганлар.
Муҳаддис, садуқ Абу Исҳоқ Иброҳим ибн Хузайм ибн Қумайр ибн Хоқон Шоший. Асли марвлик бўлганлар.
249 йилда Абд ибн Ҳумайддан «Тафсир» ва «Муснад»ларини эшитганлар. Узоқ умр кўриб, иккала китобни ривоят қилганлар.
Бу кишидан Абу Ҳотим ибн Ҳиббон, Абдуллоҳ ибн Аҳмад ибн Ҳаммувайҳ Сарахсий ва бошқалар ҳадис ривоят қилганлар. 318 йили шаъбон ойида Ибн Ҳаммувайҳ Шошда Иброҳим ибн Хузаймдан ҳадис эшитганлар. Бизга Иброҳим ибн Хузаймнинг вафотлари ва сийратлари тўғрисида маълумот етиб келмади. У киши сиқалардан бўлиб, 90 ёшда вафот этганлар. Аллоҳ раҳмат қилсин
«Машҳур даҳолар сийрати» китобидан
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
