«Бизнинг олдимизда учта йўл бор: ё ўлим, ё қамоқ, ёки чет элга чиқиб кетиш»
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
САВОЛ: «Бизнинг олдимизда учта йўл бор: ё ўлим, ё қамоқ, ёки чет элга чиқиб кетиш» деб эътиқод қиладиган ва тасаввуфни инкор этадиганлар қайси дийний оқимга тегишли. Улар ваҳҳобийми, агар ваҳҳобий бўлса, нима учун ўзларини ваҳҳобиймиз деб аташмайди. Улар шайх Муҳаммад Содиқ Муҳаммад Юсуф ҳам ваҳҳобий дея иддао этадилар, шунга нима дейсиз?
ЖАВОБ: Бисмиллаҳир Роҳманир Роҳийм.
Бундай одамларни «бетайинлар» ва «нима деганини ўзи билмайдиганлар» десак, адашмаган бўламиз, деб умид қиламан. Улар жоҳил кишилар бўлиб, дийнимизга зарар етказишдан бошқа иш қўлларидан келмайди. Улардан ҳазир бўлиш ва уларга қарши курашиш керак.
Мен Аҳли сунна ва жамоа эътиқодидаги ва Ҳанафий мазҳабидаги оддий бир мусулмонман, алҳамдулиллаҳ. Агар сиз сўз юритаётган одамлар менинг ҳақимда мазкур сўзларни айтган бўлсалар, туҳмат қилибдилар. Туҳмат эса, гуноҳи кабийрадир. Бу гуноҳни туҳматга қолган банда кечирмагунча, Аллоҳ таоло кечирмайди. Мазкур шахслар одамларнинг бошини айлантириш ўрнига, ҳеч бўлмаса, гуноҳи кабийра нималигини, бировга туҳмат қилишнинг оқибати жуда ҳам оғир эканини билиб олсалар, яхши бўлар эди. Аллоҳ таоло адаштирмасин! Валлоҳу аълам
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
