Баҳрайндаги Қуръон мусобақасида қатнашувчилар сони 1100 дан ошди
Мусобақа ташкилотчиларидан бири, Баҳрайндаги “Иқро” номли Қуръон илмлари жамияти раҳбарининг ўринбосари Абдуллоҳ Абул Ҳасаннинг айтишича, иштирок этиш истагини билдирганларнинг сони 1100 нафардан ошган бўлиб, Тафсир йўналишида қатнашиш учун 175 нафар, Ҳифз ва Тиловат йўналишларида қатнашиш учун 931 нафар йигит ва қизлар рўйхатга олинган.
Ушбу мусобақа қатнашчиларини баҳолаб бориш Баҳрайндаги бир неча Қуръони карим марказларининг етук устозларидан иборат ҳакамлар ҳайъати томонидан олиб борилади, деб хабар беради IQNA.
Ўринбосарнинг қўшимча қилишича, бу йилги мусобақани ўтказишдан халқаро Қуръон мусобақалари савиясини янги босқичга кўтариш ҳам кўзда тутилган. Мусобақанинг ҳар бир йўналишини бирлаштириш орқали Қуръоний маданият ютуқларини кучайтириш, Қуръонни яхши тушунувчи авлодни шакллантиришга эришилади. Шу сабабли бу йилги мусобақа “Англаб ёд ол, тадаббур ила тиловат қил!” шиори остида ўтказилмоқда.
Бу йилги мусобақанинг ўзига хослиги шундаки, ҳифз йўналишида энди ҳар бир иштирокчи ёддан ўқши керак бўлган сурадаги калималар, сўзларнинг маъноларини ҳам ёддан айтиб бериши керак бўлади.
Тиловат йўналишида иштирок этаётган эса ўзи ўқиб берган жойнинг тафсирини ҳам айтиб бериши керак.
Абдуллоҳ Абул Ҳасаннинг айтишича, бу йилги мусобақада “Мулоҳазалар варақаси” ҳам ташкил этилади. Ҳакамлар ҳайъати орасидан белгиланган устозлар ушбу вараққа иштирокчининг йўл қўйган хатолари, камчиликлари, савияни оширишга хизмат қилувчи таклифларни ёзиб боришади ва мусобақадан кейин ҳар бир иштирокчига тегишли варақ ўзига тақдим этилади. Бу усул иштирокчининг йўл қўйган камчиликларини англашга ҳамда уларни тузатишга кўмак беради.
Islom.uz портали таҳририяти
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
