Элчихонага ҳадялар
Жорий йилнинг 15 январь куни «Ҳилол нашр» нашриётида чоп этилган китоблар, жумладан, фазилатли шайх Муҳаммад Содиқ Муҳаммад Юсуф ҳазратларнинг барча асарлари ва юртимиз уламоларининг бир қатор диний-маърифий китоблари Ўзбекистоннинг Истанбулдаги бош консулига топширилди. Мазкур асарларни »Ҳилол нашр« нашриёт-матбааси директори Абдувоҳид Саттиев Ўзбекистоннинг Истанбулдаги бош консули Шерзод Абдуназаровга тақдим этди. Ушбу маърифий асарлар Туркиядаги миграция маркази кутубхонасига ва қамоқхоналардаги ватандошларимизга мутолаа қилишлари учун етказиб берилади. Юртдошларимиз ушбу китобларни ўқиш орқали фойдасиз ишлардан сақланиб, келажакда ўз ўринларини топишлари учун ёрдам бериш мақсад этилган.
Ватандошларимизга шайх ҳазратларининг барча асарлари, хусусан, «Олтин силсила Саҳиҳул Бухорий» ва «Саҳиҳи Муслим» тўлиқ тўпламлари, «Мукаммал саодат йўли», «Ижтимоий одоблар», «Васатия – ҳаёт йўли», «Ихтилофлар: сабаблар, ечимлар», «Очиқ хат», «Дин насиҳатдир», «Мазҳаблар – бирлик рамзи» асарлари тақдим этилди. Шу билан бир қаторда «Таълим ва тарбия», «Мўминнинг касби», «Сиз қандай яшамоқчисиз?», «Улуғлар шундай яшашган», «Соҳилсиз денгиз», «Имом Аъзам», «Салаф солиҳларни салафийларга ўхшатманг» ва бошқа муҳим маълумотларга эга бўлган асарлар етказилди.
Маълумот ўрнида Ўзбекистон Бош консуллигининг консуллик округи таркибига Истанбул шаҳри, Туркиянинг Ойдин, Баликесир, Билежик, Бурса, Измир, Кожаэли, Киркларели, Маниса, Муғла, Сакаря, Текирдаг, Чанаккале ва Эдирне вилоятлари, шунингдек, Болгария ва Руминия киради.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
