Жория қиссаси
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Имом Тобароний, Ибн Асокир ва Байҳақийлар Ибн Аббос розияллоҳу анҳудан ривоят қиладилар:
«Бир жория Умар ибн Хаттоб розияллоҳу анҳунинг олдиларига келиб:
«Хожам менга туҳмат қилиб, ўтнинг устига ўтқазиб, фаржимни куйдириб қўйди», деди.
Умар унга: «У сени ўша нарсани қилаётганингни кўрдими?» деди.
Жория: «Йўқ», деди.
Умар: «Сен унга бирор нарсани эътироф қилдингми?» деди.
Жория: «Йўқ», деди.
Умар: «Уни олдимга келтиринглар!» деди.
Хожани келтиришди. Умар у одамга:
«Аллоҳнинг азоби ила азоблайсанми?!» деди.
У: «Эй мўминларнинг амири, у мени ўз нафсида туҳмат қилди», деди.
Умар: «Сен унинг ўша нарсани қилаётганини кўрдингми?» деди.
У: «Йўқ», деди.
Умар: «У сенга ўша нарсани эътироф қилдими?» деди.
У: «Йўқ», деди.
Умар: «Нафсим қўлида бўлган Зот ила қасамки, агар Расулуллоҳ соллаллоҳу алайҳи васалламнинг «Мамлук учун хожасидан, бола учун ота-онадан қасос олинмайди», деганларини эшитмаган бўлганимда, сендан унинг қасосини олган бўлар эдим», деди ва уни юз қамчи урди.
Сўнгра жорияга:
«Сен кетавер, озодсан! Сен Аллоҳнинг ва Унинг Расулининг мавлосисан! Гувоҳлик бераманки, мен Расулуллоҳ соллаллоҳу алайҳи васалламнинг «Ким ўт билан куйдирилса ёки қийналса, у озоддир, у Аллоҳнинг ва Унинг Расулининг мавлосидир», деганларини эшитганман», деди».
«Ҳадис ва ҳаёт» китобининг 23-жузидан олинди
Ушбу китоб Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитанинг 2021 йил 24 августдаги 03-07/5165 рақамли хулосаси асосида чоп этилган.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
