Муроқаба ҳақидаги асарлардан намуналар | Тазкия дарслари (298-дарс)
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
– Абдуллоҳ ибн Динор айтади:
«Умар ибн Хаттоб розияллоҳу анҳу билан бирга Макка томон йўлга чиқдик. Тун охирида бир жойга етганда тўхтадик. Тоғ томондан бир чўпон тушиб келди. Умар унга:
«Эй чўпон! Менга қўйларингдан бирини сот», деди.
«Мен қулман», деди у.
«Хўжайинингга «Бўри еб кетди», деб қўявер», деди Умар.
«Аллоҳ қаерда қолади?!» деди у.
Умар йиғлаб юборди. Эрталаб уни топди. Хўжайинидан сотиб олиб, озод қилди ва:
«Мана шу бир оғиз сўз сени бу дунёда озод қилди. Умид қиламанки, у сени охиратда ҳам озод қилади», деди.
– Абдуллоҳ ибн Муборак бир одамга:
«Аллоҳ таолони муроқаба қил», деди.
Ҳалиги одам бунинг тафсирини сўраган эди:
«Доимо худди Аллоҳ таолони кўриб тургандек бўл», деди.
– Суфён Саврий: «Ҳеч бир нарса Ундан махфий бўлмайдиган Зотни муроқаба қил. Вафонинг эгаси бўлган Зотдан ражо қил», деди.
– Абу Усмон айтади: «Менга Абу Ҳафс:
«Агар одамлар билан ўтирсанг, ўзингга ва қалбингга воиз бўл, улар сенинг олдингда жамланганларидан ғурурга кетма. Улар сенинг зоҳирингни муроқаба қиладилар. Аллоҳ эса ботинингни муроқаба қилади», деди».
– Ҳумайд Товийл Сулаймон ибн Алига:
«Менга ваъз қил», деди.
«Агар У Зот сени кўриб турганини билиб туриб, маъсият қилсанг, катта нарсага журъат қилган бўласан. Агар У Зот сени кўрмайди деб ўйласанг, кофир бўласан», деди.
«Руҳий тарбия» китобининг 2-жузи асосида тайёрланди
Ушбу китоб Ўзбекистон Республикаси Дин ишлари бўйича қўмитанинг 2021 йил 14 апрелдаги 03-07/2439-рақамли хулосаси асосида чоп этилган.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
