Муфтий ҳазратлари Қатар элчисини қабул қилдилар
Бугун, 19 февраль куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Қатар давлатининг Ўзбекистондаги фавқулодда ва мухтор элчиси Ҳасан бин Ҳамза Ҳошим жанобларини қабул қилдилар.
Муфтий ҳазратлари Ўзбекистон ва Қатар давлатлари алоқалари охирги йилларда ривожланаётгани, Тошкент ва Доҳа шаҳарларида элчихоналарнинг очилиши кўп томонлама муносабатларни мустаҳкамлашга ҳисса қўшаётгани, Ўзбекистон мусулмонлари идорасининг Қатар давлатидаги диний-маърифий йўналишдаги ташкилотлар, жумладан, Халқаро мусулмон уламолари кенгаши билан ҳамкорлик йўлга қўйилганини таъкидладилар.
Шайх Нуриддин Холиқназар ҳазратлари кейинги йилларда юртимизда барча йўналишлар қатори диний-маърифий соҳада ҳам катта ижобий ўзгаришлар бўлаётгани, жумладан, Марказий Осиёда ягона бўлган Фатво маркази иш бошлагани, масжид-мадрасалар очилаётгани, фуқароларга Қуръони карим ва тажвидни ўргатиш курслари фаолияти йўлга қўйилганини алоҳида қайд этдилар.
Ҳасан бин Ҳамза Ҳошим жаноблари самимий қабул учун миннатдорлик билдириб, икки давлат ўртасидаги алоқалар жадал суръатда тараққий этаётгани, ўтган 6 ойда давлат раҳбарлари 2 марта учрашгани, 30 та олий даражадаги ҳужжатлар имзоланганини билдирди. Келгусида Қатарнинг Вақф ва ислом ишлари ҳамда Ўзбекистон мусулмонлари идораси ўртасида ҳамкорлик йўлга қўйилиши ҳар икки томон учун ҳам фойдали бўлишини маълум қилди.
Элчи жаноблари Шайх Нуриддин Холиқназар ҳазратларини ўзларига қулай вақтда Қатар давлатига ташриф буюришларига таклиф этиб, ушбу мамлакатдаги диний-маърифий соҳа йўналишидаги ташкилотлар билан яқиндан ҳамкорлик ўрнатиш ҳар жиҳатдан манфаатли бўлишига ишонч билдирди.
Учрашув дўстони ва самимий руҳда ўтди.
Ўзбекистон мусулмонлари идораси Матбуот хизмати
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
