Бир долларга сотилган мерседес
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Америкалик бева аёл ҳолати аъло даражада бўлган мерседес автомашинасини бир долларга сотиши ҳақида эълон берди. Кўпчилик буни ҳазил деб ўйлаб, ушбу эълонга эътибор бермадилар. Лекин кекса бир киши эълонда кўрсатилган рақамга қўнғироқ қилиб, машинани кўриш учун борди. Қараса, чиндан ҳам машинанинг ҳолати аъло даражада экан. Кекса киши аёлдан: «Бу машинанинг тақалган нархи неча пул» деб сўради.
Аёл: «Эълонда айтилганидек бир доллар», деди.
Отахон аёлга бир долларни берди, аёл эса машинанинг барча ҳужжатларини тақдим этди. Кекса киши бўлаётган ишлардан ҳайратда эди.
У аёлдан: «Нега бир долларга сотаётганингизнинг сабабини билишни истайман», деди.
Аёл: «Эримнинг васиятини бажаряпман», деди.
Отахон ҳайратини яшира олмай: «Эрингиз ушбу машинани шу ҳолида айнан шу нархга сотишни васият қилганми?», деб сўради.
Аёл: «Йўқ-йўқ, эрим котибаси билан дон олишиб юрар эди. Ўлимидан олдин машинанинг пулини ўша котибасига юборишни васият қилган», деб вазиятни тушунтирди.
Ҳа, унча-мунча аёл кундошлик юкига бардош бериши қийин бўлади.
Аллоҳ таоло турли сабаблар билан эридан ажрашган аёлларга оилавий бахт-саодат ато қилсин. Эри билан аҳил яшаётган опа-сингилларимизнинг оилаларини бахтга, саодатга лиммо-лим қилсин.
Нозимжон Ҳошимжон таржимаси
Хуршид Маъруф тайёрлади
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
