Африка фотиҳи
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ибнул Асир «Комил»да шундай дейди: Уқба ибн Нофеъ раҳимаҳуллоҳ Африкада шаҳар қурмоқчи бўлди. Шаҳарда мусулмон аскарлари, оилалари ва моллари зарарлардан омонда бўлишини мақсад қилган эди.
Шаҳар учун Қайрувон мавзеси танланиб, у ер турфа хил йиртқич, ваҳший ҳайвонлар, ўта заҳарли илонлар ва бошқа заракунандаларга тўла эди.
Уқба Аллоҳ таолога дуо қилди. Зотан, у дуоси мустажоб инсонлардан эди. Сўнгра: «Эй йиртқичлар ва илонлар. Биз Аллоҳ расули Муҳаммад соллаллоҳу алайҳи васалламнинг асҳобимиз ва бу ерда яшамоқчимиз. Бу ердан кетинглар. Бугундан кейин бу ерда қай бирингизни кўрсак, қатл қиламиз», деб хитоб қилди.
Унинг бу хитобидан сўнг ўша жой аҳолиси бўлган кўплаб барбарлар, кун давомида йиртқич ҳайвонлар ва заҳарли илонларнинг болаларини эргаштириб, у жойдан чиқиб кетаётганини кўришди ва иймон келтириб, мусулмон бўлишди.
Бу Уқба ибн Нофеъ Фиҳрий роҳимаҳуллоҳ бўлиб, у тобеъинларнинг катталаридан бўлган. Миср фатҳида иштирок этган. Кейинчалик Муовия розияллоҳу анҳунинг даврида Триполи, Жазоир ва Мағриб ерларини фатҳ этган. Ҳижрий 50 (670) йилда Мағрибдаги биринчи исломий шаҳар — Қайрувонни бино қилган. Мазкур шаҳар ҳам даъват, ҳам қўшин тўпланадиган марказ бўлган ва у ерда машҳур Уқба ибн Нофеъ масжиди бино қилинган.
Кўплаб ўлкаларни фатҳ этган буюк қўмондон Атлантика қирғоғигача бўлган ерларни фатҳ этиб, асосий қўшинни Қайрувонга жўнатади. Ўзи 300 аскар билан ортга қайтаётган вақтда душман кўп сонли қўшин билан уларга ҳужум қилади. Натижада Уқба ибн Нофеъ ҳам шаҳид бўлади...
Манбалар асосида тайёрланди
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
