ДИҚҚАТ, ТАНЛОВНИНГ 3-ЧОРАГИ БОШЛАНДИ!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Маълумки, Islom.uz портали «МАЗҲАБЛАР — БИРЛИК РАМЗИ» шиори остида тўрт чоракдан иборат танлов эълон қилган эди.
Бугунги кунгача 1-чорак — ҳанафий ва 2-чорак — моликий мазҳабига оид мавзудаги материалларни иштирокчиларимиз @islomuztanlovbot манзилига беришди. Ушбу мақолалар islom.uz сайтининг танловлар рукнига жойланди ва ижтимоий саҳифаларда тарқатилди. Шу билан 2-чорак якунланганини маълум қиламиз.
Бугундан бошлаб 3-чорак — шофеъий мазҳабига оид мавзулардаги материалларни иштирокчиларимиз @islomuztanlovbot телеграм манзилига юборишлари мумкин.
Танлов шартларини эслатиб ўтамиз:
Танлов иштирокчиларидан қуйидаги мавзуларда мақола ҳамда (араб, рус, инглиз, форс ва бошқа тиллардан) таржималар, илмий-тадқиқот ишлари, аудио ва видеосуҳбатлар тақдим этишлари талаб этилади:
— Мазҳаб тушунчаси ва унинг тарихи;
— Мазҳаб ҳақида мўътабар уламоларнинг фикрлари;
— Мазҳаб имомлари ва уларнинг шогирдлари;
— Мазҳабнинг усуллари;
— Мазҳабга оид мўътабар асарлар;
— Масҳабсизлик ва унинг хатарлари.
Танлов шартига кўра, тақдим этилаётган материаллар аввал бошқа манбаларда берилмаган бўлиши, илмий асосга эга бўлиши лозим.
Танлов тўрт чоракдан иборат бўлиб, ҳар бир чорак битта мазҳабга бағишланади:
1-чорак — ҳанафий мазҳаби;
2-чорак — моликий мазҳаби;
3-чорак — шофеъий мазҳаби;
4-чорак — ҳанбалий мазҳаби.
Иштирокчилар томонидан тақдим этилган материаллар islom.uz сайтида эълон қилиб борилади. Танлов 1443 йил зулҳижжа ойида (2022 йилнинг июль ойида) якунланади. Ғолиблар қимматбаҳо мукофот ва эсдалик совғалар билан тақдирланади.
Марҳамат танловда иштирок этинг!
Аллоҳ таоло хайрли ишларимизни бардавом қилсин!
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
