Аллоҳ Набий алайҳиссаломни Ўзи поклади
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Албатта, Аллоҳ таоло Пайғамбаримиз Муҳаммад соллаллоҳу алайҳи васалламни Ўзи поклаб, Қуръони Каримда у кишини таърифлаб, қуйидаги оятларни нозил қилди.
– У зотнинг ақлу зеҳнларини поклади: «...Сизларнинг соҳибингиз (яъни, Муҳаммад алайҳиссалом) залолатга ҳам кетгани йўқ, йўлдан ҳам озгани йўқ». (Нажм сураси, 2-оят).
– У зотнинг кўзларини поклади: «(Пайғамбарнинг) кўзи (ўнгу сўлга) оғгани ҳам йўқ, ўз ҳаддидан ошгани ҳам йўқ». (Нажм сураси, 17-оят).
– У зотнинг қалбларини поклади: «(Пайғамбарнинг) кўнгли кўрган нарсасини инкор этмади». (Нажм сураси, 11-оят).
– У зотнинг кўксиларини поклади: «(Эй Муҳаммад алайҳиссалом), Биз Сизнинг қалбингизни (иймон ва Қуръон нури билан) кенг-мунаввар қилиб қўймадикми?» (Шарҳ сураси, 1-оят).
– У зотнинг зикрларини поклади: «Ва Биз сизнинг зикрингизни (яъни, мартабангизни) баланд қилиб қўйдик». (Шарҳ сураси, 4-оят).
– У зотнинг елкаларини поклади: «Ва Биз Сиздан елкангизни эзиб турган оғир юкингизни олиб қўйдик». (Шарҳ сураси, 2-оят).
– У зотнинг таълимларини поклади: «Унга (бу ваҳийни) бир кучга тўлган, соҳиби қудрат (яъни, Жаброил алайҳиссалом) таълим бермишдир». (Нажм сураси, 5-оят).
– У зотнинг сидқ-садоқатларини поклади: «Ва у (сизларга келтираётган Қуръонни) ўз ҳавойи-хоҳиши билан сўзламас» (Нажм сураси, 3-оят).
– У зотнинг ҳилмларини поклади: «...Барча мўъминларга марҳаматли, меҳрибон бўлган бир пайғамбар келди-ку!» (Тавба сураси, 128-оят).
– У зотнинг бутунлай поклади: «Албатта Сиз улуғ Хулқ устидадирсиз». (Қалам сураси, 4-оят).
Манба: arabic.uz
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
