Аср муфассири
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Азҳар шайхи Али Жодулҳақ раҳимаҳуллоҳдан «Нега шайх Шаъровий докторлик даражасини олмаганлар?» деб сўрашганда, Азҳар шайхи «Ким у кишининг илмига эга бўлдики, имтиҳон қилса» деган эканлар.
Маълумки, бировга докторлик илмий даражасини бериш учун унга илмий иш топширилади, ўша ишни ҳимоя қилаётганда имтиҳон қилиб кўрилади, мавзусига доир саволлар берилади.
Шайх Шаъровий раҳимаҳуллоҳ йирик, забардаст олимлардан бўлиб, Мисрда Қуръони Карим тафсири дарслари телевизор орқали бутун мамлакатга узатилган. Баъзи уламолар у кишини «Аср муфассири» дейишган. Шу боис ҳам Азҳар шайхи ана шундай олимнинг илмидек илмга ким эришдики, у кишини имтиҳон қилиб, докторлик даражасини берса деган маънода гапирганлар.
Шайх Шаъровий раҳимаҳуллоҳ айтадилар:
«Уйда кийимларимни ўзим ювиб, овқатимни ўзим пишираман. Ўз-ўзимга хизмат қилишга одатланганман».
Йирик олим либосларини ўзлари ювиб, таомларини ўзлари пиширишлари камтарлик намунасидир.
Шайх Али Жодулҳақнинг васиятларига кўра, у кишининг жанозасини шайх Шаъровий ўқиган эканлар.
Аллоҳ таоло икки олимни ҳам раҳматига олсин!
«Биз танимайдиган Шаъровий» китоби ва интернет маълумотлари асосида Нозимжон Ҳошимжон тайёрлади
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
