1444 йил 18 муҳаррам | 2022 йил 16 август, сешанба
Минтақа:
ЎЗ UZ RU EN
Мақолалар

Ким сендан хулқда ўзиб кетса демак динда ўзиб кетибди!

15:00 / 04 июль 2028 pdf Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Жаъфарнинг кимлигини биласизми? У ҳақида Набий соллаллоҳу алайҳи васаллам: «Сен менга яратилишинг жиҳатидан ҳам, хулқинг жиҳатидан ҳам ўхшайсан!», деганлар.

У жуда ҳам гўзал, келишган йигит эди.

У Ҳабашистонга ҳижрат қилган илк мусулмонларга бошлиқ эди.

У Ҳабашистон подшоҳи Нажошийнинг олдида қурайш элчиси Амр ибн Осни баҳсда мағлуб қилган эди.

У Набий соллаллоҳу алайҳи васалламнинг қалбларидан мустаҳкам жой эгаллаган эди. Унинг Ҳабашистондан қайтиши Хайбар фатҳи вақтига тўғри келди. Набий соллаллоҳу алайҳи васаллам уни кўриб шундай деган эдилар: «Қайси бири билан хурсанд бўлишни билмаяпман. Хайбар фатҳи биланми ёки Жаъфарнинг келиши биланми?».

У тенгсиз баҳодир эди. Муъта жангида Зайд ибн Ҳорисадан сўнг қўмондон бўлди. Сўнгра бутун буюкликни ўзида жамлаб Муъта жангида шаҳид бўлди. Ҳижрат буюклигини, саҳобалик буюклигини, шаҳидлик буюклигини...

Мадинада эса Расулуллоҳ соллаллоҳу алайҳи васаллам Муъта жанги тафсилотларини ваҳий орқали кишиларга айтиб турган эдилар. Расуллоҳнинг қўмондонлари бирма-бир шаҳид бўлганида уларга Мадинада туриб марсия айтиб турдилар. Охирида Аллоҳнинг қиличи Холид розияллоҳу анҳу қўмондонликни қўлга олди. У мусулмонларни қийин вазиятдан олиб чиқиб кетди. У зотнинг маҳорати ҳалигача ҳарбий қўмондонларга дарс беради.

Ўшанда кишилар ўз яқинларини йўқотиб маҳзун бўлиб йиғлашди. Набий соллаллоҳу алайҳи васаллам: «Жаъфарнинг оиласига таом қилиб беринглар. Уларнинг бошига уларни машғул қиладиган нарса келди», дедилар.

Қандай буюк пайғамбар! Қандай буюк дин!

«Жаъфарнинг оиласига таом қилиб беринглар!».

Бу дунё йўқотиш дунёсидир. Бугун видолашамиз. Эртага биз билан видолашишади. Бугун биз тобут кўтарамиз. Эртага бизнинг тобутимизни кўтаришади. Аммо бу дин қийинчилик пайтида ҳам, енгиллик пайтида ҳам раҳмат динидир. Бу дин елкадош бўладиган, ҳамдард бўладиган, юпатадиган диндир. Инсонни кишилар ёнида туриши каби ҳеч нарса юпата олмайди. Расулуллоҳ соллаллоҳу алайҳи васаллам бизга кишисини йўқотган хонадонларга таом қилиб беришимизни ўргатаяптилар. Чунки уларнинг бошига тушган мусибат уларни таом таёрлаш каби ишларга эътибор беришдан чалғитади.

Бу дунё олди-берди дунёси экан. Бугун бизга инсонлар таом қилиб беришади. Эртага биз уларга таом қилиб берамиз. Аммо шуни билишимиз керакки, иш ошқозонни тўлдиришдан анча каттароқдир. У яраланган қалбни даволаш ва маҳзун дилни овутишдир.

Йўқотишга учраган ҳар-бир хонадоннинг дардини енгиллатиш Расулуллоҳ соллаллоҳу алайҳи васалламнинг: «Жаъфарнинг оиласига таом қилиб беринглар!», деган гапларига амал ҳисобланади.

Гоҳида маййит аҳлининг таъзия учун кенг уйи бўлмаслиги мумкин. Унга уйингизни бўшатиб берсангиз қани!

Гоҳида маййит аҳли маросим харажатларига қийналиб қолади. Уларга ёрдам берилса қани!

Гоҳида маййит аҳли йўқотган кишини даволашда бор будидан айрилади. Қани энди тирикларга ҳам, ўликка ҳам ёрдам берилса!

Ибнул Жавзий роҳимаҳуллоҳнинг гапи қандай ҳам гўзал:

«Диннинг барчаси хулқ. Ким сендан хулқда ўзиб кетса демак динда ўзиб кетибди!».

Абдулқодир Полвонов тайёрлади

Манба
islom.uz
Мавзуга оид мақолалар
Савдогар киши шубҳали нарсалардан йироқда бўлиши жуда ҳам зарурдир. Тижоратда кўп учраб турадиган шубҳали, ноаниқ, аслини билиб бўлмайдиган, шунинг билан бирга, давоми...

1205 12:05 / 15.09.2019
Савол Ўн йилдан буён фарзанд кўрмаётганимиз сабабли бола асраб олиш ниятимиз бор. Шариат бўйича асранди боланинг ҳам анчамунча ҳуқуқлари бор деб эшитдик. Шулар давоми...

1615 16:00 / 22.08.2020
Жавоб1. Тупукни оғизда тўплаб, сўнг ютиб юбориш.2. Гапираётган, зикр қилаётган, ўқиётган чоғда лаблари ҳўл бўлса, ўша ҳўлликни ютиш.3. Оғзидан оқаётган сўлакни давоми...

2004 09:10 / 21.05.2019
Қуръони Каримда Ҳадид сураси бор. Бу сура Мадинада нозил бўлган. Сурада темирни нозил қилингани, унда катта кучқувват ва одамлар учун манфаатлар борлиги зикр давоми...

993 15:26 / 14.10.2020
Аудиолар

86384 11:58 / 10.10.2018
«Ҳилол» журнали
Китоблар

15544 14:35 / 11.08.2021
Топ рейтинг www.uz Openstat