Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

عَنْ عَمْرِو بْنِ الْحَارِثِ رَضِيَ اللهُ عَنْهُ قَالَ: مَا تَرَكَ رَسُولُ اللهِ صلى الله عليه وسلم عِنْدَ مَوْتِهِ دِرْهَمًا وَلَا دِينَارًا وَلَا عَبْدًا وَلَا أَمَةً وَلَا شَاةً، إِلَّا بَغْلَتَهُ الْبَيْضَاءَ وَسِلَاحَهُ وَأَرْضًا جَعَلَهَا صَدَقَةً. رَوَاهُ الثَّلَاثَةُ وَالنَّسَائِيُّ.

Амр ибн Ҳорис розияллоҳу анҳудан ривоят қилинади:

«Росулуллоҳ соллаллоҳу алайҳи васаллам вафот этган вақтларида дирҳам ҳам, динор ҳам, қул ҳам, чўри ҳам, қўй ҳам қолдирмадилар. Фақатгина оқ хачирлари, силоҳлари ва садақа қилган ерлари қолди».

Учовлари ва Насаий ривоят қилганлар.

Демак, Пайғамбаримиз соллаллоҳу алайҳи васалламдан кейин қолган нарса бор-йўғи урушда ишлатиладиган силоҳ ва битта урғочи оқ хачир бўлган. Фатҳ қилинган ерлардан кўп қатори теккан улушларини садақа – вақф қилиб қўйган эдилар. Мория Қибтия онамиз Иброҳим розияллоҳу анҳуни туққанлари учун чўри эмас, Умму Валад бўлганлар. У киши Пайғамбаримиз соллаллоҳу алайҳи васалламнинг вафотлари билан ўз-ўзидан ҳур бўлиб қолганлар.

Пайғамбаримиз соллаллоҳу алайҳи васаллам садақа қилган ерлар Фадак ерининг ярми, Қуро водийсининг учдан бири, Хайбар, Бани Назирдан ўзларига теккан улуш ерлар эди.

«Ҳадис ва ҳаёт» китобидан