1445 йил 17 зулқаъда | 2024 йил 25 май, шанба
Минтақа:
ЎЗ UZ RU EN
Силаи раҳм

48-боб. Соҳибининг моли, фарзанди кўпайишини сўраб дуо қилган киши

16:00 / 25.06.2019 2547 pdf Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

88. Анасдан ривоят қилинади:

«Бир куни Набий соллаллоҳу алайҳи васалламнинг ҳузурларига кирдим. У ерда мен, онам ва холам Умму Ҳарамдан бошқа ҳеч ким йўқ эди. Расулуллоҳ соллаллоҳу алайҳи васаллам олдимизга келиб:

«Сизларга бир намоз ўқиб берайми?» дедилар. Ўшанда намоз вақти эмас эди. 

Шу пайт (ҳадис тинглаётган) одамлардан бири:

«Анасни қаерга турғаздилар?» деди.

«Уни ўнг томонларига турғаздилар», деди. 

«Сўнгра бизга намоз ўқиб бердилар. Кейин аҳли байтимиз ҳаққига Аллоҳдан дунё ва охиратнинг барча яхшиликларини сўраб дуо қилдилар. Кейин онам:

«Эй Аллоҳнинг Расули! Кичкина хизматчингизни ҳам бир дуо қилинг», дедилар.

Ул зот менга барча яхшиликларни тилаб дуо қилдилар ва дуоларининг охирида:

«Аллоҳим! Бунинг молини ва бола-чақасини кўпайтиргин ва унга буларда барака бергин», дедилар».

Шарҳ: Бошқа ривоятларда ҳазрати Анас ибн Молик розияллоҳу анҳунинг «Ҳозир мендан боласи кўп, мендан моли кўп одам йўқ, бундан кейин ҳам Расулуллоҳ соллаллоҳу алайҳи васалламнинг дуолари билан Аллоҳ уларга барака беради, деб ўйлайман», деганлари айтилган.

Дарҳақиқат, Расулуллоҳ соллаллоҳу алайҳи васалламнинг дуолари билан ҳазрати Анас ибн Молик юз ёшдан ортиқ яшаганлар, у киши энг охирги вафот этган саҳобалардан бирларидир. Мол-дунёлари ҳам жуда кўп бўлган.

Сиз билан бизнинг орамизда урф бўлган «ували-жували бўлсин, серфарзанд, сердавлат бўлсин» деб дуо қилиш ҳам Расулуллоҳ соллаллоҳу алайҳи васалламнинг суннатларига мувофиқдир.

Ёр-дўст, биродарлар, қавм-қариндошлар бир-биримизни дуо қиладиган бўлсак, «серфарзанд қилсин, бадавлат қилсин, барака берсин, бахт-саодатли қилсин» деб дуо қилишимиз ниҳоятда яхши бўлар экан.

Расулуллоҳ соллаллоҳу алайҳи васалламнинг Анас ибн Молик ва у кишининг оналари, холалари ҳаққига дуо қилишдан олдин намоз ўқиганлари, ҳам бу дунёнинг, ҳам охиратнинг яхшиликларини сўраб дуо қилишлари, умумий дуодан сўнг маълум бир кишига (Анас ибн Моликка) хослаб дуо қилганлари бизга жуда катта ибрат бўлиши керак.

Ушбу ҳадисдан олинадиган фойдалар:

1. Набий соллаллоҳу алайҳи васаллам фарз намоз вақтидан бошқа пайтда ҳам жамоат билан намоз ўқиганлари.

2. Имом билан бир эркак киши бўлса, у имомнинг ўнг тарафида туриши кераклиги.

3. Улуғ ва дуогўй кишиларнинг намоздан кейин маълум шахслар ҳаққига дуои хайр қилишлари борлиги.

4. Баъзи кишиларга алоҳида дуо сўраш мумкинлиги.

5. Яхшилик сўраб дуо қилиш жоизлиги.

6. Молу дунё сўраб дуо қилиш жоизлиги.

7. Серфарзанд бўлишни сўраб дуо қилиш жоизлиги.

8. Барака тилаб дуо қилиш жоизлиги.

«Одоблар хазинаси» китобидан

Муаллиф
Шайх Муҳаммад Содиқ Муҳаммад Юсуф
Манба
islom.uz
Мавзуга оид мақолалар
Бир бева аёлнинг ёлғизгина ўғли бор эди. Онаизор фарзандини вояга етказди, ўқитди ва уйлантирди. Кунларнинг бирида ўғил онани ташлаб, сафарга чиқишга қарор давоми...

3699 11:00 / 23.06.2022
94. Ибн Умардан ривоят қилинади.Аллоҳ уларни оталарига ва болаларига яхшилик қилганлари учунгина аброр яхшилар деб номлагандир. Худди отаонангнинг сенда ҳаққи давоми...

3013 20:00 / 24.07.2019
Миқдоддан ривоят қилинади.Набий соллаллоҳу алайҳи васалламнинг .Ўзинг учун ишлаб топган таоминг садақадир. Болангга, аёлингга ёки ходимингга едирган таоминг ҳам давоми...

1211 11:00 / 27.10.2020
43. Абу Бакр ибн Ҳазмдан, у киши Набий соллаллоҳу алайҳи васалламнинг саҳобаларининг биридан ривоят қилади.Расулуллоҳ соллаллоҳу алайҳи васаллам .Дўстлик мерос давоми...

2357 11:30 / 20.01.2019
Аудиолар

121909 11:58 / 10.10.2018
«Ҳилол» журнали
Китоблар

43313 14:35 / 11.08.2021