284 20.04.2017

 ذَلِكَ الْكِتَابُ لاَ رَيْبَ فِيهِ هُدًى لِّلْمُتَّقِينَ۝

2 - 2. «Ушбу Китобда ҳеч шубҳа йўқ, у тақводорларга ҳидоятдир».

Яъни «Қуръони карим шундай Китобки, унинг ҳақлигига ҳеч шак-шубҳа йўқ. Унда ҳамма нарса очиқ-ойдин, аниқ-равшандир».

Қуръони каримнинг яна бир сифати шуки, у «тақводорларга ҳидоятдир». Ҳидоят мақсадга эриштирувчи йўлни лутф билан кўрсатишдир. Тақводорлар эса уқубатга элтувчи нарсалардан сақланадиган шахслардир. Демак, Қуръони карим ҳидоятидан баҳраманд бўлиш учун тақводор бўлиш керак экан. Кимки Қуръони каримдан ҳидоят олибдими, демак унда тақво бор экан.