Келасиз қачон?
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Бу кун боғларимни қопламиш хазон,
Гулзорим бе диллар айлади яксон,
Кўзлар интиқ боқар йўлингиз томон,
Гул юзлигим мени, келасиз қачон?
Мурғак ғунчаларни этдилар нобут,
Аларга печакдан ясадим тобут,
Висолга зор бўлдик, Илоҳим шоҳид,
Гул юзлигим мени, келасиз қачон?
Кўнглимни озорлар этдилар абгор,
Ҳолимдан тинмайин кулмоқда ағёр,
Сиғидирмайин қўйди ҳаттоки мозор,
Гул юзлигим мени, келасиз қачон?
Гулзорим хорлади қарғаю зоғлар,
Бинафша устига қулади тоғлар,
Кўриб кўрмаганга олмоқда соғлар,
Гул юзлигим мени, келасиз қачон?
Ҳижрон кундан кунга олар аланга,
Оҳларим сиғмайди бутун оламга,
Қон юргизиб шўрлик муздек танамга,
Гул юзлигим мени, келасиз қачон?
Ошиқлар ошиқар висол онига,
Ифорингиз ором алар жонига,
Муҳаббат тўлдириб дунё томига,
Гул юзлигим мени, келасиз қачон?
Сочингиздан томган ул ёқут, дурлар,
Нархига баробар келмайди ҳурлар,
Кўнгилларга бериб ажиб сурурлар,
Гул юзлигим мени, келасиз қачон?
Маҳбубим номини олган эй гўзал,
Ҳақингизда томмиш ул тилдан асал,
Насаби оламда энг поки насл,
Гул юзлигим мени, келасиз қачон?
Кутаман тоинки бор танда жоним,
Қўлларингиз тутсам йўқдир армоним,
Унгача оламни тутгай фиғоним,
Гул юзлигим мени, келасиз қачон?
Роббано раҳм айла, Умидинг ночор,
Ул ёр висолига минг зор, интизор...
Умиджон Хасанов
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
